02 May, 2023 01:22 PM IST | મુંબઈ | Abhisha Rajgor
અમિતાભ બચ્ચન માતા તેજી બચ્ચન સાથે
મા સાથે તમે કેટલા વર્ષો વિતાવ્યા છે તે નથી ગણાતું પરંતુ કેટલી ક્ષણો વિતાવી છે તેની ગણતરી થાય છે. આમ તો માતાના મહિમાને ઉજવવા માટે એક દિવસ પુરતો નથી. પરંતુ મધર્સ ડે આવી રહ્યો છે ત્યારે અમિતાભ બચ્ચને એક ખાસ ગીત લઈને આવ્યા છે.
અમિતાભ બચ્ચન અને સુજીત સરકાર ખાસ `મા` ગીત માટે સાથે આવ્યા છે. અને આ ગીત ખૂબ જ હ્રદયસ્પર્શી છે. પિકુ અને પિંક બાદ અમિતાભ બચ્ચન અને સુજીત ફરી એકવાર આ ગીતથી સાથે આવ્યા છે. અનુજ ગર્ગના મ્યુઝિક અને પુનીત શર્માના શબ્દો સાથે આ ગીત માટે ખાસ મોન્ટાજ વીડિયો બનાવવામાં આવ્યો છે. માતાને સલામ કરતા આ ગીતને અમિતાભ બચ્ચને અવાજે એક અનેરી ઉંચાઈ આપી છે.
ગીત વિશે સુજીત સરકાર વાત કરતા કહે છે કે, "આ ગીત માત્ર એવા જ લોકો માટે નથી જેમણે પોતાના માતાને ગુમાવ્યા છે, પરંતુ એવા લોકો માટે પણ છે જેઓ નસીબદાર છે કે તેઓ હજુ પણ તેમની માતા સાથે છે. આ વિચાર મને મ્યુઝિક સાથે આવ્યો હતો. અનુજે આ મ્યુઝિક તેમના પત્નીને બર્થ ડે પર ખાસ સરપ્રાઈઝ આપવા માટે તૈયાર કર્યું અને મને સંભળાવ્યું. ગીતમાં તેના નાના દીકરા યજતનો અવાજ છે અને આ વીડિયોમાં પણ તેનો અવાજ છે. મે આ મ્યુઝિક પર મોન્ટાજ વીડિયો બનાવવાનું વિચાર્યું, કારણ કે મને મ્યુઝિક બહુ જ ગમ્યું હતું. મને એમ લાગ્યું કે આ ગીતના લિરીક્સ સાથે અમિતાભ બચ્ચન સિવાય કોઈ ન્યાય નહીં આપી શકે. મે એમને શરૂઆતમાં તેમની માતા સાથેના ફોટોસ અને એક નાની વીડિયો ક્લિપ મોકલી. તેમને આ વિચાર પસંદ આવ્યો. મારા માટે આ પાવરફુલ ક્ષણ હતી. હું માતાને એક બાળક અને એક એવા વ્યક્તિ પાસેથી અંજલિ અપાવી રહ્યો હતો જેણે જિંદગીના અનેક દાયકાઓ જોઈ નાખ્યા છે. ઉંમર કોઈ પણ હોય, આપણે માતાને હંમેશા યાદ કરીએ છે."
આ પણ વાંચોઃ સ્ક્રિન પર પહેલી વાર બીગ-બી અને ઈમરાન હાશ્મી એકસાથે દેખાશે
આ ગીત એક લાગણીસભર યાત્રા સમાન છે. અને તે તમને તમારી માતાની યાદ જરૂરથી અપાવશે.